parliament_voteქალთა პოლიტიკურ ცხოვრებაში მონაწილეობის უზრუნველსაყოფად, პარლამენტსა და საკრებულოებში ქალთა წარმომადგენლობის გაზრდის მიზნით, შესაძლოა ახალი კანონი ამოქმედდეს.  საუბარია, მანანა კობახიძისა და გუგული მაღრაძის მიერ პარლამენტში ინიცირებულ კანონპროექტზე, რომელიც გულისხმობს, რომ პარტია საარჩევნოდ საბაზო დაფინანსების (წელიწადში 300 000 ლარი) 30%-იან დანამატს მხოლოდ იმ  შემთხვევაში მიიღებს, თუ საარჩევნო სიის ყოველ სამეულში განსხვავებული სქესის (მდედრობითი) ერთი კანდიდატი მაინც ეყოლება წარმოდგენილი. 

კანონპროექტის ავტორები ასევე მანანა კობახიძე და გუგული მაღრაძე არიან. პროექტის თანახმად, ცვლილებები “მოქალაქეთა პოლიტიკური გაერთიანებების შესახებ“ კანონის 30-ე მუხლში  შევა. ცვლილებათა პაკეტი პარლამენტს 9 ივნისს წარედგინა და მისი განხილვა დაჩქარებული წესით 24 ივნისამდე მოხდება.

როგორც კანონპროექტის განმარტებით ბარათში ვკითხულობთ, მიუხედავად იმისა, რომ მოქმედი კანონმდებლობა ფინანსურად ახალისებს იმ პარტიებს, რომელთა საარჩევნო სიებშიც გენდერული კვოტები დაცულია (ყოველ ათეულში ერთიმეორისაგან განსხვავებული სქესის სულ მცირე 30%-იანი წარმოდგენა) ქალ წევრთა რაოდენობა – როგორც უმაღლეს, ისე ადგილობრივი თვითმმართველობის წარმომადგენლობით ორგანოებში, მაინც მცირეა.

ამის მიზეზად  კანონპროექტის ავტორები კანონის არასათანადოდ ზუსტ ფორმულირებას ასახელებენ და აღნიშნავენ, რომ მოქმედი კანონმდებლობა პოლიტიკურ პარტიას საშუალებას აძლევს საარჩევნო სიაში ერთიმეორისაგან განსხვავებული სქესის სულ მცირე 30%-იანი წარმომადგენლობა  სიის ყოველ ათეულში, მაგრამ ბოლო სამ ადგილზე წარმოადგინოს.

შედეგად,  კანონი დაცულია, პარტია დანამატად საბაზო დაფინანსების  (წელიწადში 300 000 ლარი) 30%-საც იღებს, თუმცა, თვითმართველობის ორგანოებში წარმოდგენილი ქალების რაოდენობა კვლავ მცირე რჩება.

ახალი კანონპროექტის თანახმად კი პარტია 30%-იან დანამატს  მხოლოდ იმ შემთხვევაში მიიღებს, თუ საარჩევნო სიის ყოველ სამეულში ერთ განსხვავებული სქესის  კანდიდატს მაინც  წარმოადგენს.